Breaking News

என் உயிரோடு கலந்தது


என்தேசத்தை நினைத்து
மூச்சும் விடச்சுடுகிறது
ஊரை உறவை நினைத்து
உறக்கமும் வருகுதில்லை
காலாற நடந்த தெருக்கள்
கண்முன்னே விரிகிறது
கிழிந்தகால்ச்சட்டை
கழண்டுவிழ வளையம்உருட்டி
மணல்வீடுகட்டி ஓடித்திரிந்து
மண்சோறு சமைத்து
ஊஞ்சல்கட்டி ஆடிமகிழ்ந்து
சைக்கிள்ஓடி விழுந்தெழும்பி
பந்தடித்து நகம் உடைத்து
அக்காதம்பியுடன் சண்டைபிடித்து
அப்பர் வந்து தடியெடுத்து
விழுந்த அடியில் அழுதகோலம்
இப்படி எல்லாம் நடந்தவைகள்
நினைவில்வந்துவந்து போகுது
அந்தச்சந்தோஷம் ஆனந்தமே
எழுத ஆயிரம் இருக்கு–
எழுதும்போது விம்மல் எடுத்து
அழவேண்டும்போலகிடக்கு
கண்ணீர் வடிந்தோடுது
என்நாவறண்டு போகுது
நெஞ்சுக்குள் ஏதோசெய்யுது
இன்று வீட்டுக்குள் இருக்க
ஒரேயோசனையாய் இருக்குது
உலகெங்கும் மரணபயம்
சாவுகளை நினைத்து
சஞ்சலப்படுகுது மனசு
தினம் ஏக்கத்தால் என்வாழ்வு
இங்கே கடந்துபோகுது
சந்தோஷம் கரைந்துபோகுது
என்மண்ணே என்ஊரே
உன்னை எப்படி மறப்பேன்
என்மண்வாசம் அந்த புழுதிவாசம்
இப்பவும் பெருமூச்சில் மணக்கிறது
இன்னொரு பிறப்பு உண்டானால்
என் ஏழாலைமண்ணிலேதான்
அந்தமயிலங்காட்டு ஊரிலேதான்
என் நிரந்தரமான வாழ்விருக்கும்’
சந்தோஷம் அங்கேதான் நிறைந்திருக்கும் இது உண்மை
(மயிலங்காடு இந்திரன்)

leave a reply