Breaking News

வாழ்வுதிரும் நாள்கள்

பாழடைந்த மண்வீட்டில்
கரையான் புற்றைப் போல்
ஒவ்வொரு இரவும்
உச்சம் தொடுகிறது விலையேற்றம்
பெறுமதியிழந்து போன
அச்சுத்தாள்களிலெல்லாம்
பொருளற்றுக்கிடக்கிறது
வெற்று எண்களின் எண்ணிக்கை
வாழ்க்கைச் செலவுகளின்
பயப்பீதியில் கொடுநோயாளியாய்
ஒவ்வொரு நாள்களையும்
ஏக்கம் கொண்டே கடக்கவேண்டியிருக்கிறது
தினம் தினம் செய்திகளெல்லாம்
பேரிடியாய் வந்து வீழ்கிறது
ஏழைகளின் அடிவயிற்றில்
பெரும் சாபக்கேடாகவே
மாறியிருக்கிறது
அடித்தட்டு மக்களின்
ஒருவேளைக்கான உணவு
பதுக்கல்களும் தட்டுப்பாடுகளும்
தாராளமாகிப்போன இந்நாள்களில்
காணாமற் போனோர் பட்டியலில்
இணைந்திருக்கிறது மனிதநேயம்!
நடுச்சாமம் ஆகியும்
ஓயாமல் அழுதுகொண்டிருக்கிறது
இங்கே ஓர் பசி நிரம்பிய ஏழைக் குடிசை!

  • வேலணையூர் ரஜிந்தன்.

leave a reply