Breaking News

உனக்கு_நான்_அந்நியமாகிவிட்டேன்

சாளரங்களை திறந்துவருகிற மழைத்துளிகள் போல
அத்துமீறி நுழைந்த உன்னை ஆராதித்திருந்தேன்
எல்லா புன்னகைகளையும்
எல்லா நேசங்களையும்
எல்லா இரகசியங்களையும்
நீ திருடுவதற்காகவே சேமித்ததைப்போல
தாரைவார்த்திருக்கிறேன்
ஒரு காலத்தின் குளிரை கடப்பதற்கு
ஆடைகளை தயார் செய்வதைப்போல
நேசங்களின் தாக்குதல்களை
எதிர்கொள்ள நான் கற்றுத் தெரிந்திருக்கவில்லை
நேசமென்பதொரு சொல்
அந்தச் சொற்களை அப்பியிருக்கிற
முகங்களோடு
நிறைந்த அமுதக் கடலென ஆற்பரிக்கும்
ஆத்மார்த்த காதல்
நெருக்கம் கொள்ள அவாவுற்று
நொதித்துப்போய்விடுகிறது
நீ சொல்லிச் சென்ற வார்த்தைகளுக்குள்
எங்காவதொரு உண்மை இருக்குமா என
நான் தேடிப்பார்க்கிறேன்
அத்தனை அழகாய் ஒரு மாயத்தை
நிகழ்த்துவது பற்றி நீ எங்கிருந்து
கற்றுக்கொண்டாய்
யாரோ ஒருவரை கடக்கும் போது
உன் அகண்ட விழிகள் அச்சமூட்டுகிறது
என்னை நோக்கிவருகிற புன்னகைகளை
அத்துனை அச்சத்தோடு எதிர்கொள்ள வேண்டியிருக்கிறது
யாரோ ஒருவரை தேடிச்செல்லும் போது
உன் நெருக்கங்கள் நிகழ்த்திய
பெருவலி தடுத்துவிடுகிறது
இருந்தும் ஒரே இடத்தில் அமர்ந்திருப்பதால்
வாழ்க்கை எதையும் எனக்கு தரப்போவதில்லை
என்பதை நான் அறிய முற்பட்டிருக்கிறேன்
எல்லாவற்றையும் ஒரு காற்றைப்போல
சடுதியாய் நிகழ்த்திவிட்டு
ஏதும் நிகழாதது போல நீ
அங்கேதான் இருக்கிறாய்
ஒரு அந்நிய பெண்ணைப்போல
நான் உன்னை கடக்கிறேன்
#அனாதியன்

leave a reply